උපුටා ගැනීම සිළුමිණ දීපානි අතිරේකය
මාධ්‍ය ලෝකයේ රසවතුන් ගේ කතාව
සංඛ අමර්ජිත්
එදා මෙදාතුර මාධ්‍ය ලෝකය අරුත් ගැන්වූ රස ගැන්වූ අපූර්වතම චරිත බොහෝ ය. ජීවිතය හැර ගියද ඒ මතක සහෘද හදවත් තුළ සදාතනික වේ. ප්‍රවීණ මාධ්‍යවේ
දී සංඛ අමර්ජිත් විසින් රචිත ‘වැඩකට නැති පොත’ මාධ්‍
ය කලාවේ සොඳුරු මතක සහ චරිත පිළිබඳ කියැවෙන අපූරු කෘතියකි. වර්තමානයේ සංඛ අමර්ජිත් රූපවාහිනී ප්‍රේක්ෂකයන් අතර ප්‍රකටව
සිටින්නේ ජනප්‍රිය නිවේදකයකු ලෙසටය. 1990 දශකය අගභාගයේදී ඔහු විසින් ‘සඳරේණු’යොවුන් පුවත්පතට ලියූ ‘කොමිටල් විජිතය’ එකල යොවුන් පරපුර අතර අතිශයින් ජනප්‍රිය විශේෂාංගයක් විය. සංඛ අමර්ජිත් නම් ඒ ජනප්‍රිය ලේඛකයා පසු කලෙක සිරස එෆ්.එම් ගුවන් විදුලි නාළිකාවේ ආරම්භක සාමාජිකයකු වෙමින් එහි නිවේදකයකු ලෙස කටයුතු කළේය. මේ වන විට ඔහු නිවේදකයකු ලෙස මාධ්‍ය ක්ෂේත්‍රයේ නිරතව සිටින අතර වෘත්තියෙන් නීතිඥයකු ලෙස කටයුතු කරයි. ‘වැඩකට නැති පොත’ කෘතිය පිළිබඳ සංඛ අමර්ජිත් මෙසේ පැවසීය.
“පත්තරේට ‘කොමිටල් විජිතය’ ලිව්වට පස්සේ මට එවැනි විශේෂාංගයක් හෝ පොතක් ලිවීමට විවේකයක් ලැබුණේ නැහැ. බොහෝ දෙනාගෙන් ඉල්ලීම් තිබුණා ආයෙමත් ලියන්න කියලා. නමුත් මාධ්‍ය කටයුතු සහ වෘත්තීය කටයුතු එක්ක කාර්ය බහුල වීම නිසා මට ලේඛන කටයුතුවල යෙදෙන්න විවේකයක් තිබුණේ නැහැ. ඒ අතරේ එම්.ඩී. ගුණසේන සමාගමේ ප්‍රචාරක කළමනාකරු ජයම්පති මහතා මට යෝජනා කළා ‘කොමිටල් විජිතය’ පොතක් කරන්න. නමුත් අවිවේකී බව නිසා ම මට ඒ ලිපි ටික සකස් කරලා දෙන්නවත් අවස්ථාවක් ලැබුණේ නැහැ. ඔහොම ඉන්නකොට කොවිඩ් 19 අවදානම නිසා පහුගිය දවස්වල ලොකු විවේකයක් ලැබුණා. ඒ නිසා මට හිතුණා පොතක් කරනවා නම් අලුත්ම දෙයක් කරන එක වඩා සුදුසුයි කියලා. ඒ උත්සාහයේ ප්‍රතිඵලයක් විදිහට තමයි ‘වැඩකට නැති පොත’ පොත එළිදකින්නෙ.“
‘වැඩකට නැති පොත’ බැලූ බැල්මට ම අමුතු නමකි. පොතේ පිට කවරයේ ඉහළින් ම සඳහන් වන්නේ ”වැඩක් තියනවා කියලා හිතෙනවා නම් විතරක් කියවන්න”කියා ය.
මේ අමුතු පොත ගැන අමුතු කතාව අප කතුවරයාගෙන් විමසුවෙමු.
“මාධ්‍ය ක්ෂේත්‍රයට ආව දා සිට මම ඇසූ දුටු අත්විඳි රසවත් සිදුවීම් සමුදායක එකතුවක් විදිහට මේ පොත හඳුන්වන්න පුළුවන්. සත්‍ය සිදුවීම් සහ සැබෑ චරිත පාදක කරගනිමින් අන්වර්තිත නම් යොදා ගනිමින් තමයි පොත ලිව්වේ. එවැනි රසවත් කතා 30ක් පොතට ඇතුළත් වනවා. ඒ අතරින් පළවැනි කතාවේ නම වන ‘වැඩකට නැති පොත’ කියන නම තමයි පොතේ නම විදිහට යෙදුවේ.”
මෙවැනි කෘතියක් ජනගත කිරීමේ අපේක්ෂාව ගැන මාධ්‍යවේදී සංඛ අමර්ජිත් මෙසේ පැවසීය.
“බොහෝ අය කියනවා ඉස්සර හිටපු මාධ්‍යවේදීන් ඉතා සුන්දර, අපූරු පුද්ගලයන් කියලා. එවැනි පුද්ගලයන් මියගියත් ඔවුන්ගේ මතක අපි නිතරම සිහි කරනවා. එවැනි සුන්දර රසකාමී පුද්ගලයන් අද මාධ්‍ය ක්ෂේත්‍ර යෙත් සිටිනවා. නමුත් බොහෝ වෙලාවට ඒ සිදුවීම් සමාජගත වන්නේ නැහැ. සමාජය සුන්දර කරන, රසවත් කරන එවැනි මාධ්‍ය වේදීන් ගැන කියන්නයි මම මේ කෘතිය මගින් අදහස් කළේ”
පසුගිය 23 වැනිදා කොළඹ ජාත්‍යන්තර පොත් ප්‍රදර්ශණ භූමියේ ඇම්. ඩී. ගුණසේන ප්‍රදර්ශන කුටියේදී මාධ්‍ය වේදී සංඛ අමර්ජිත්ගේ ‘වැඩකට නැති පොත’ කෘතිය ජනගත විය. රේඩියෝවලත්, ටෙලිවිෂන්වලත් සිදුවූ උපහාසයෙන් හා වැඩකට ඇති කතාවලින් පිරුණු ’වැඩකට නැති පොත‘ වැඩකට නැති පොතක් දැයි තීරණය කිරීමේ අයිතිය කතුවරයා නිහතමානීව පාඨක ඔබට බාර කළේය.
0 Comments:
Post a Comment