මැක්ස්, ඔබ ඔහුව පසුව හඳුනාගනු ඇත
ග්‍රන්ථය - අදිසි නදිය
කර්තෘ - කපිල කුමාර කාලිංග
සුරස ප්‍රකාශකයෝ
මිල -රු. 500 (පිටු 328)
“මෙම නගරය පෘථිවියේ කොතැනක පිහිටියේ දැයි දැනගැනීමට ඔබ වෙහෙසිය යුතු නැත. මේ කතාව අවසානයේ දී ඔබ ඒ පිළිබඳව කිසියම් නිගමනයකට එනු ඇත. බොහෝ විට ඔබට එය දැනගැනීමට අවශ්‍ය නොවනු ඇත. ලෝකයේ හෝ විශ්වයේ ඇතැම් දෑ සංකල්ප රූප වශයෙන් මිස භෞතික වශයෙන් නොපවතින බව සත්‍යයකි.”
ඒ අනුව එම නගරය කල්පිතයක් යැයි සිතිය හැකි ය. නමුත් එහිලා පැනෙන යථාර්ථය එය වනාහි කොහෙත්ම කල්පිතයක් නොවේ. එකල්හි එහි මනුෂ්‍ය පැවැත්ම කෙසේ වී ද?
“කුමන දුෂ්කර තත්ත්වයක් යටතේ හෝ ජීවිතය සාර්ථක ලෙස පවත්වාගෙන යාම වීර ක්‍රියාවක් වන කාලයන්හී ද, ජීවත්වීම වටා බැඳුණු වෙනත් අතුරු කාරණා නොවැදගත් දේ සේ අමතක කර දැමීම ද මනුෂ්‍ය ස්වභාවයේම ගති ස්වභාවයකි.”
නගරය තුළ විටින් විට දේශපාලනීය අත්‍යාලංකාර උත්සව පැවැත්වේ. නමුත් මැක්ස් (ඔබ ඔහුව පසුව හඳුනාගනු ඇත.) පවසන්නේ ව්‍යසනයේ අදිසි නදිය නගරය යටින් ගලා යන බව ය. ගැලවීම යනු තමන් වෙත පැවරුණු වගකීමක් බවට පත්ව තිබේ. මක්නිසාද යත් සමාජ සංවිධානයේ ප්‍රධානම මෙහෙයුම් ගාමකත්වය වන දේශපාලනය මේ සම්බන්ධයෙන් හැසිරෙන්නේ වෙනම න්‍යාය පත්‍රයක් මත බැවිනි. එවැනි පසුබිමක ඒ සමාජ දේශපාලන තත්ව නිරූපණය සම්බන්ධයත් පාඨකයාට හැඟීමක් ලබා දෙමින් මැක්ස් ලිලී ට මෙසේ පවසයි.
“ලිලී මේ පොළව යට සිරගෙයක ඔයාව දකින්න ආශාවෙන් ඉන්නා කෙනෙක් ගැන ඔයා මට කියල තියෙනවා. ඒ විතරක් ද, ඔයාගෙ ගුරුවරයා, නෑදෑයො.....ඒ නිසා ඔයා පපා වෙනුවෙන් හරි අවදානම බාර ගන්න ලෑස්ති වෙන්න එපා.”
ඒ අතරවාරයේ දී යට කියවුණ තත්ව නිරූපණය තවදුරටත් පුළුල් කරමින් නගරයේ එක් අඳුරු ඉසව්වක රහස් සැමරුම් උත්සවයක් ද පැවැත් වේ.
“මීයන් මේ රැයේ සමරන්නේ කලින් කලට ඝාතනය කෙරුණු හෝ අතුරුදහන් කෙරුණු තම සගයින් ය. ඔවුන් මෙවර ඒ සඳහා උපක්‍රමිකව තෝරාගෙන ඇත්තේ සමුහ මිනී වළක් ඇතැයි සැලකෙන වනගත බිම් පෙදෙසකි. රාත්‍රියට යොදා ගැනුණේ දිවා කාලයෙහි ඒ සඳහා කිසිදා ඉඩක් නැති බැවිනි.” කල්පිත නගරය පුරා වැටී තිබුණේ එවැනි කොයි ආකාරයෙන් වත් අතාත්වික කල්පිතයක් නොවන යථාර්ථයේ අඳුරු සෙවණැලි ය.
ඒ අනුව එතැන කතාවක් තිබේ. ඒ අඳුරු සෙවණැලි මේ යැයි පෙන්වා දෙන වීරයෙක් ද සිටී. ඔහුගේ නම මැක්ස් ය. ඔහු ව්‍යසනය දකී. එයට එරෙහිව නැගී සිටීම සිය වගකීම යැයි සිතයි. එසේ හෙයින් ම මෙසේ පවසයි.
“මේ වගේ වෙලාවලට අපි කඩා වැටිලා හරි යන්නෙ නෑ. හිස කෙළින් තියාගන්න. එතකොට තමයි විසඳුම් පෙනෙන්න ගන්නෙ.”
නමුත් වීරයා යනු කවරෙක් ද? ඉතිහාසය විසින් වීරයින් බිහි කරනු ලබයිද? එසේ නැත්නම් වීරයින් විසින් ඉතිහාසය නිර්මාණය කරනු ලබයි ද? එය අපූරු ද්වන්දයක් බව ඇත්ත ය. එහෙත් සත්‍යය බිහි වන්නේ එවැනි ද්වන්දයන් තුළින්ම ද? එවැනි පසුබිමක මැක්ස්ගේ ඉරණම කුමක් ද?
කතුවරයා මෙසේ අසයි.
ඉන්දියානු නිදහස් සටන් ඉතිහාසයේ මහා වීර මහත්මා ගාන්ධි....කුමක් වී ද ඔහුගේ අවසාන ඉරණම? තවද කාලය විසින් වීරත්වය වෙනස් නොකරන්නේ ද? ජර්මනිය යැයි මහ හඬ නගා ජර්මානුවන් උන්මාදයට පත් කළ ඇඩොල්ෆ් හිට්ලර්ගේ ඉරණම....එය එසේ අවසන් වෙතැයි ඔහුවත් සිතුවාද? සෝවියට් ශක්තියත් සමඟ උඩට එසවුණ ස්ටාලින්ගේ හිස කාලය විසින් අවසානයේ දී බිමට නොම හැරවුයේද? ඉනුත් නොනැවතී ඇමරිකානු ගොපලු චිත්‍රපට ඔබ නරඹා ඇත්නම් ඒ සිනමා සංස්කෘතිය තුළ වීර ක්ලීන් ඊස්ට්වුඩ්ගේ වීරත්වයට කාලය විසින් කුමක් සිදු කරන ලද්දේ ද? අදිසි නදිය හි මැක්ස් නම් වීරයාට සිදු වූයේ කුමක් දැයි සොයා යන මඟ දෙපස එවැනි ඵෙතිහාසික සංසිද්ධීන් ද තිබේ.
ව්‍යසනය හඳුනා ගන්න. මැක්ස් ජනතාව හමුවේ පවසයි. ජනතාව මඳක් නිහඬව සිට ඒ හඬ අමතක කොට දැමුවේ ද? ව්‍යසනයක ලකුණක් හෝ නැති සංදර්ශනාත්මක විලාසිතා හමුවේ මැක්ස්ගේ හඬ කුමක් ද? ජනතාව එසේ සිතුවාද? ව්‍යසනය නම් මේය. ඔහු දේශපාලනඥයන් හමුවේ පවසයි. එහෙත් ජනතාවගෙන් ප්‍රතික්ෂේප වූ මිනිසෙකු වීරයෙක් වන්නේ කෙසේද? ව්‍යසනය පෙන්වා දෙන්න. මැක්ස් විපක්ෂ බලවේග හමුවේ පවසයි. එහෙත් ඔවුන්ට අනුව නම් තමන් බලයට ආ කල්හි ව්‍යසනයට විසඳුම් දෙනු ඇත. සැවොම පසුවන්නේ කාලයත් සමඟ සූදු කෙළිමිනි. ඔවුන්ට මේ පැවැත්ම එකම සූදූවක් වී ඇති සෙයකි.
කතුවරයගේ පෙන්වා දීමට අනුව අදිසි නදිය තුන් ඈඳුතු දැක්මක් ඔබ හමුවේ තබයි. මුලින්ම ෆැන්ටසියක් හෝ විකාරරූපි ප්‍රකාශනයක් හැටියට දකින්නට ඉඩ අවසරයක් ඔබ එහි දකිනු ඇත. ඒ කතුවරයාගේ දැක්ම ය. දෙවනුව කතාවේ වීරයා වන මැක්ස්ගේ දැක්ම ඔබට හමුවනු ඇත. ඒ අනුව ඔහුගේ ගනුදෙනුවේ සාර්ථක අසාර්ථක බව ඔබ විසින් විමසන්නට යෙදෙනවා ඇත. තෙවනුව ඔබට හමු වන්නේ එහි දේශපාලන විග්‍රහය යි. එය ඔබ විසින් ම විමසනු ලබනවා ඇත.
හුවාන් රුල්ෆො මෙසේ පවසයි.
“යම් කෘතියක් වාර ගණනක් කියවීමට නොහැකි නම් එය එක් වරක් කියවීමෙන් පලක් නැත.”
0 Comments:
Post a Comment